காக்கைக் குஞ்சு

ஒரு காக்கைக் குடும்பத்தின்
விடலைப் பருவக் குட்டிப்பையன்.

முதல் உலக அறிமுகத்தில்
வைத்த உணவருந்தத் தெரியவில்லை.

சிவந்த வாய் பிளந்து நிற்கும்
தாய்நோக்கி யாசிப்பதுபோல்.

சுவர்மேலே ராஜநடை கொண்டு
நடந்து நடித்துப் பார்க்கும், கர்வமுடன்.

தவறி விழுந்து சுவர் கவ்விநிற்கும்,
வெள்ளத்தில் விழுந்த கைகள் கரை பற்றத்
துடிப்பதுபோல்.

பல்லி புரிந்து, பாம்புடன் விளையாடும்
விளைவுகள் அறியாமல்.

அறிமுக வாழ்க்கையின் ஆபத்துக்கள்
ஆனந்த விளையாட்டுக்களாய்.